BUTUAN CITY – Nagpa-abot og ayuda ang Police Regional Office kon PRO-13 ngadto sa pamilya og kabanay sa ilang gi-ilang duha ka mga rebeldeng New People’s Army kon NPA nga namatay matud pa sa engkwentro tali sa tropa sa gobyerno ngadto sa kabukiran sa Brgy. Diatagon, Lianga, Surigao del Sur.
Personal nga gibisita ni PRO-13 regional director Chief Supt Gilberto Cruz, ang pamilya nila Randyl Gallego og Emel Tejero kinsa gihaya sa police station sa San Agustin, Surigao del Sur aron i-arrange ang paglubong kanila.
Una na silang gi-turn over sa kasundaluhan ngadto sa San Agustin Municipal Police Station ning mi-aging adlaw human matud pa sila gi-abandona sa ilang mga ka-ubanan sa bukirang bahin sa Brgy. Diatagon.
Apan base sa gipa-abot nga sumbong sa pipila ka mga kabanay sa mga biktima, yanong mga mag-uuma lamang sila nga gikan sa tribong Manobo kinsa biktima matud pa sa pagpang-harass sa mga sundalong sakop sa 75th IB, Philippine Army.
Sigon sa usa matud pa sa mga bkitimang si Ariel Pagalan, 36-anyos, mamaligya unta sila og lanot rason nga mibiya sila gikan sa ilang komunidad niadtong Enero 24 uban sa laing lima niya ka mga katribo.
Una matud pang mitugbong ang upat nga sila Emil Tejero, 36-anyos og Randyl Gallego, 20-anyos, Gerry Tejero og Oto Lumibay, apan paglabay sa pipila ka minutos nadunggan na lang nila ang mga buto sa armas sa may Km. 30.
Dihang ila kining gisundan ni Valentin Gallego, 18-anyos dinhi na sila gisita sa mga sundalo og gipasanginlang mga rebeldeng NPA dayong dala sa kampo human gikuhaan og hulagway samtang pugsanong gipadala og armas.
Dinhi usab nila nasuta nga biktima diay sa mga buto nga ilang nadunggan ang upat nila ka mga ka-ubanan nga miresulta sa pagkamatay nila Emil Tejero og Randyl Gallego og pagka-missing hangtud karon nila Gerry Tejero og Oto Lumibay.(Beth Ruiz)
