BUTUAN CITY – Padayon ang imbestigasyon sa kapulisan sa Zamboanga City aron masuta nila ang identity sa mga nanglabay og granada sulod sa moske sa Brgy. Talon-talon sa Zamboanga City kaganinang kaadlawon apil na ang motibo niini.
Ang maong hitabo mikalas og duha ka mga indibidwal og mi-angol usab sa laing tulo kondiin gi-ila ni P/Sr. Insp. Shelamie Chang, tigpamaba sa Zamboanga City Police Station ang mga namatay nga sila Hajji Sakal Imbatu og Rex Habil nga parehong taga-Basilan og pulos nga Islamic preachers.
Sa eksklusibong pakighinabi sa Bombo Radyo Butuan, gibutyag sa opisyal nga midalikyat sa ilang siyudad ang maong mga Islamic religious leaders alang sa himuong Islamic preaching.
Ang mga angol anaa na sa stable nga kahimtang kondiin ang duha gipapa-uli na sa Basilan human nasegurong wala nabutang sa delikado ang ilang kinabuhi.
Gidugang ni Insp. Chang nga sa pagkakaron padayon pang gipakisayran sa ilang mga imbestigador ang motibo sa kremin og pag-ila sa mga responsable, gamit ang posibleng makuhang CCTV footages ingon man mga testimoniya gikan sa mga posibleng saksi sa hitabo.
Giklaro usab ni Insp. Chang nga wala sila’y nadawat nga hulga ilabina ang kadumalahan sa moske adiser ang maong hitabo.
Hinuon apil sa ilang gilantaw kung duna ba’y mga tawong nasuko ngadto sa mga biktima didto sa Basilan og hayan sa Zamboanga City lang gihimo ang nasangpit nga kremin. (Beth Ruiz)
