photo credit: Wardams Delopere
BUTUAN CITY – Nailhan na ang patay’ng lawas nga nakaplagan sa suba sa Distrito 6, Barangay Punta sakop sa lungsod sa Nasipit, Agusan Del Norte kagahapon sa mga alas 11:30 sa buntag.
Sa pakighinabi sa Bombo Radyo Butuan, gibutyag ni Police Sr. Insp. Franklin Lakana, Hepe sa Nasipit Municipal Police Station, human nataho ang maong insedente sa usa ka back hoe operator , dunay midool nga pamilya sa police station ug gi-ila ang patay’ng lawas nga si Roderick Cultura, 16-anyos nga taga Barangay San Vicente ning siyudad sa Butuan.
Base sa impormasyong nakuha gikan sa inahan niini nga si Liza Cultura, niadtong Enero 23 pa milayas ang namatay nga dunay derensiya sa pangisip og naghambin sa sakit nga patol kon epilepsy.
Nakita matud pang naglabay-labay sa tulay ang biktima nga gitoohang nahulog hinungdang kini nalumos sa suba.
Gipadayag usab ni Police Sr. Insp. Lakana nga base sa ilang inisyal nga pakisusi, wala’y nakitang foul play sa hitabo og karun ang patay nga lawas gipahiluna sa pribadong punerarya sa maong lungsod. (Rolan Janea)
