BUTUAN CITY – Gikalipay ni Commission on Election kon COMELEC – Maguindanao Provincial Supervisor Atty. Ernie Palanan ang hapsay og malinawong pagpahigayon sa unang hugna sa plebisito sa Bangsamoro Orgnanic Law kon BOL sa probinsiya.
Sa pakighinabi sa Bombo Radyo Butuan, gipadayag ni Atty. Palanan nga wala na siya’y nadunggan pang dili maayong panghitabo sa maong lugar tungod kay ang tanang katawhan sa Maguindanao, malinawong mituman sa ilang katungod sa pagpili.
Gani, gisugyot sa opisyal nga mas maayong walaon na ang dili maayong panglantaw mahitungod sa lalawigan nga nahatag human sa gibansagang Ampatuan massacre.
Nanghinaot na lang ang abogado nga magpadayon na ang kamalinawon sa maong lugar hangtud na sa midterm elections karong Mayo 13.
Samtang sa plebisito usab sa Cotabato City, gipasabot sa opisyal nga dunay nahitabong mga away tungod na usab sa kamabination sa katawhan diha sa pagpili apan bisan pa man niini, makonsidera gihapong hapsay sa katibuk-an ang aktibidad sa lugar.
Gipasabot sa opisyal nga ang plebisito usa ka demokratikong proseso diin pangutan-on ang apektadong katawhan kung uyon ba sila sa BOL o dili. (Rolan Janea)
