BUTUAN CITY – Gipasanginlan sa New People’s Army kon NPA ang padayong operasyon sa militar sa kabukiran sa langay nga pagbuhi sa 16 nila ka mga bihag nga tropa sa gobyerno.
Lakip sa maong ihap ang 14 ka tropa sa kagamhanan nga nadagit human ang walay buto nga pagraid sa CAFGU Detachment sa New Tubigon, Sibagat, Agusan Del Sur niadtong Disyembre 19, 2018.
Sumala pa sa nagpa-ilang si Ka Sandara, tigpamaba matud pa sa NPA Northeastern Mindanao Region sa pakighinabi sa Bombo Radyo Butuan, wala misanong ang gobyerno sa ilang gipangayong Suspension of Military Operation kon SOMO og Suspension of Police Operation kon SOPO aron unta sa luwas nga pagbuhi sa ilang mga Prisoners of War kon POWs.
Gihupay na lang ni Ka Sandara ang kabalaka sa pamilya sa mga POW dungan sa pag-awhag kanila lakip na sa Local Crisis Management Committee nga mohangyu sa nasudnong kagamhanan ilabina kang Pangulong Rodrigo Duterte mahitungod sa ilang demanda alang na sa hingpit nga pagbuhi sa ilang mga mahal sa kinabuhi.
(Rolan Janea)
