BUTUAN CITY – Gihagit ni Mayor Librado Navarro, sa Bislig City, Surigao Del Sur ang mga opisyales sa lokal nga kagamhanan sa Butuan City nga aksyunan ang pagsulod sa Kabus Padatoon kon KAPA investment ning siyudad sa Butuan.
Sumala pa ni Mayor Navarro sa eksklusibong pakighinabi sa Bombo Radyo Butuan, angayang ipagukod na sa mga City Officials ilabina ni Mayor Ronnie Vicente Lagnada ang KAPA og dili na hulatong mokaylap pa kini.
Tungod kay sa pagbana-bana sa mayor, ugaling makatigum na og muabot sa 2-mil ka miyembro ang KAPA sa siyudad seguradong daghan na ang maglisud nga Butuanon.
Lakip sa gihagit usab ni Mayor Navarro ang Bombo Radyo nga dapat matud pang mas pakusgan pa ang pagpasabot sa katawhan mahitungod sa tinood nga katuyuan sa KAPA nga mao ang pagpangilad.
Sugyot pa sa opisyal, ipaabot ang maong reklamo ngadto sa NBI aron susama sa gihimu nilang pagpahawa didto sa ilang siyudad, operisyunan usab ang KAPA. (Rolan Janea)
