BUTUAN CITY – Nagsubo karon ang katawhan sa Surigao Del Sur human sa pagkamatay sa ilang gobernador nga si Vicente Pimentel Jr kagahapong adlawa Disyembre 25 sa edad nga 71-anyos.
Sa eksklusibong pakighinabi sa Bombo Radyo Butuan kang Datu Rico Maca, Indigenous Peoples Mandatory Representative kon IPMR sa lungsod sa San Miguel sa maong probinsiya, gipadayag niining dako ang ilang kasubo sa pagsa-ulog sa Pasko human nasayrang mitaliwan na ang amahan sa lalawigan pasado alas 2:00 kagahapon sa hapon.
Wala pa nagpagawas ug pamahayag ang pamilya Pimentel sa tinood nga hinungdan sa iyang kamatayon apan sa iyang nahibal-an, komplikasyon matud pa sa kidney ang hinungdan niini.
Sa karun, padayon pa nilang gihulat ang kumpirmasyon sa pamilyang Pimentel kung kanus-a dalhon sa probinsiya ang namatay’ng gobernador kinsa namatay samtang natulog lang human migawas sa ospital sa Manila.
Namugos matud pa ang gobernador nga mopauli sa iyang pinuy-anan aron saulogon ang Pasko kauban ang iyang pamilya.
Adiser nahimong gobernador sa Surigao del Sur, nagsilbi pa kining mayor sa lungsod sa Carrascal gikan sa tuig 1992 ngadto sa 2001 ug 2010 ngadto sa 2016 kondiin nagsugod ang iyang karera sa politika human napiling barangay kapitan sa Tandag City.
Subay niini, si Vice Governor Manuel Alameda Sr. ang mopuli sa iyang puwesto isip bag-ong governor hangtud sa piniliay sa Mayo 2019.
Mahinumdumang nagduso si Pimentel og kandidatura apan gi-withdraw kini tungod sa isyu sa iyang panglawas og ang iyang igsoong si Tandag City Mayor Alexander Pimentel, ang mipuli kaniya ug magpapili pagka-gobernador. (Rolan Janea)
