BUTUAN CITY – Giklaro sa usa ka Ka Sandara, nagpa-ilang tigpamaba sa Northeaster Mindanao Region-New People’s Army kon NEMR-NPA nga wala mahinayon ang una nang gisaad sa ilang lider nga si Jose Maria kon Joma Sison nga buhian sa mismong adlaw sa Pasko ang ilang gipangbihag nga duha ka mga sundalo og 14 ka mga CAFGU members tungod sa nagpadayong military operation.
Sa eksklusibong pakighinabi sa Bombo Radyo Butuan, gipadayag ni Ka Sandara nga kinahanglang mu-agi sa saktong proseso ang pagbuhi sa ilang mga prisoners of war kondiin apil na niini ang paghunong una sa military operations.
Dili lang matud pa angayang mabalaka ang ilang mga kabanay tungod kay gi-atiman kanunay ang ilang panglawas gawas nga wala usab sila gipasakitan isip pagsunod na sa International Humanitarian Law.
Apil matud pa sa ilang gi-atiman ang ilang pagkaon tungod kay ang makaon sa mga rebelde sa kabukiran mao usab ang makaon sa ilang mga bihag apan masinati matud pa sa maong mga bihag ang kinabuhi nilang mga rebelde diha sa kabukiran.
Samtang tungod kay karong adlawa na ang ilang ika-50 nga kasa-ulugan kon golden anniversary sa kamugnaan sa Communist Party of the Philippines-New People’s Army kon CPP-NPA, yanong kasa-ulugan lang ang ilang himuon ilabina nga wala tumpangi sa gobyerno ang una na nilang gideklarang hunong-pinusilay kon ceasefire. (Beth Ruiz)
