BUTUAN CITY – Nag-convene na ang Local Crisis Management Committee sa lungsod sa Sibagat, Agusan del Sur, aron ma-address na ang pagkadagit sa 14 ka mga tropa sa kagamhanan nga gihimo sa mga rebeldeng New People’s Army.
Sa pakighinabi sa Bombo Radyo Butuan, gibutyag ni Major Rodolfo Cordero Jr., Civil Military Operations kon CMO officer sa 401st Brigade, Philippine Army, padayon ang ilang paningkamot nga ma-locate na ang mga gipangdagit nga duha ka sundalo og dose ka mga CAFGU members aron ila gilayong mahimo ang luwas nga pagbuhi kanila.
Giklaro usab sa opisyal nga wala sila nagpasagad sa ilang tahas dungan sa panghinaut nga unta respetuhon sa mga rebeldeng abductors ang International Humanitarian Law.
Kini aron trataron sa makatawhanong paagi ang ilang mga gibihag sama sa gihimo sa mga sundalo ngadto sa madakpan nilang mga rebelde kondiin ipa-ospital pa nila ang mga angol.
Gidugang ni Major Cordero nga padayon ang imbestigasyon sa gimugna nilang Board of Inquiry aron masayran ang tinud-anay nga nahitabo sa CAFGU detachment sa Brgy. New Tubigon sa maong lungsod. (Beth Ruiz)
