BUTUAN CITY – Nadugangan pa ang ihap sa tropa sa kagamhanan nga nabihag sa mga New People’s Army kon NPA sa ilang operasyon kagahapong adlawa sa lungsod sa Sibagat, Agusan Del Sur.
Sigon ni Ka Sandara, nagpa-ilang tigpamaba sa Northeastern Mindanao Region kon NEMR sa NPA, unang gilusad ang raid sa mga ginsakpan sa Guerilla Front Committee 16 sa CAFGU Detachment sa Barangay New Tubigon sa alas 3:00 sa kaadlawon diin nabihag ang tanang sulod niini nga gilangkuban sa 12 ka mga CAFGU Members ug 2 ka sundalo.
Samtang pag-abot sa ala-1:00 ang takna sa kahaponon, gimontar sa NPA ang blockade diin na-aresto nila ang usa kamiyembro sa CAFGU nga nagduty sa Barangay Kulambugan sa susamang lungsod.
Gi-ila kini ni Ka Sandara nga si Bernade salahay, 51-anyos. Sa karun, 16 na ka tropa sa kagamhanan ang ilang gikonsiderang Prisoners Of War kon POW diin ang usa niini, ilang na-aresto sa may Barangay Los Angeles ning siyudad sa Butuan.
Samtang gihimakak usab ni Ka Sandara ang pamahayag ni Ka Boom, kanhe rebelde nga karun asset na sa military, nga dunay mga babayeng gipasulod sa detachment nga gitoohang mga amasona, hinungdang nahitabo ang walay engkuwentro nga pag-raid.
Pamugos pa ni Ka Sandara, dili binuhatan sa NPA nga himoon ug paon ang amasona diha sa ilang mga raid.
Ang malampuson matud pang raid, tungod sa maayong intelligence sa area og ang posibleng pag-kumpiyansa sa tropa sa kagamhanan. Kini ilabina kay kanunay nga propaganda na sa mga niini nga wala nay kusog ang NPA human usab sa sunod-sunod nga mga misurender
Alayon niini, gipaneguro ni Ka Sandara nga tamdan nila ang tawhanong katungod sa mga POW og ipailalom sa saktong proseso.
Gani gihupay niini ang kabanay sa mga nabihag nga dili mabalaka tungod kay walay daotang mahitabo kanila og ila kining buhian sa tukmang panahon. (Rolan Janea)
