BUTUAN CITY – Padayon pa ang gilusad nga imbestigasyon sa lokal nga kagamhanan sa Lianga, Surigao del Sur aron mapanubag ang responsable sa paghikay sa pagkaon nga gitu-hang maoy hinungdan sa pagkahilo sa 133 ka mga tawo.
Nasayrang daling gidala sa Lianga District Hospital ang mga biktima nga kadaghanan mga bata human nakakaon og spaghetti atol sa Christmas Party sa St. Christine Elementary School.
Sa maong ihap, 102 gilayon ang napapa-uli samtang padayon pang gi-atiman ang nahabiling 31 nga maoy nagrabehan sa food poisoning.
Nagkuha na usab og sample sa spaghetti og uban pang pagkaon ang Municipal Health Office nga gipa-ilalom na sa laboratory test sa ingon masayran nganong nahilo sa pagkaon ilabina sa spaghetti ang mga mimtabong sa party. (Beth Ruiz)
