BUTUAN CITY – Anaa na sa luwas nga kahimtang ang usa ka Datu human matud pa kini gi-ambush sa rebelding New People’s Army kon NPA kagahapon sa mga alas 3:00 sa hapon sa bukirang parte sa Barangay Isidro, lungsod sa Lianga, Surigao Del Sur.
Gikumpirma ni Datu Rico Maca, Indigenous Peoples Mandatory Representative kon IPMR sa San Miguel, Surigao Del Norte nga natapsingan sa wala nga bukton human ang pagpangambush si Jumar Bocales, 42-anyos, Tribal Datu sa Barangay Ganayon, Lianga sa maong probinsiya.
Sumala pa ni Datu Maca, pauli na gikan sa usa ka consultation ang biktima sakay sa single motor samtang nagsunod kaniya nga sakay usab sa laing motor ang iyang anak, asawa ug igsoon, sa dihang gipaulanan siya ug bala.
Swerte nalang kay napingsan lang si Datu Bocales og nakahimu pa kini pagbiya sa lugar samtang luwas usab ang iyang pamilya.
Ang biktima pa ang nagmaneho sa motor nga mideretso ngadto sa Lianga Municipal Police Station adiser gidala sa kapulisan ngadto sa ospital.
Pamugos pa ni Datu Maca, walay laing naninguha sa pagpatay kang Datu Bocales tungod sa kampanya niini batuk kanila gawas pa nga kandidatu ang biktima nga mahimong IPMR sa lungsod sa Lianga.
Bisan paman niini, gipaneguro ni Datu Maca nga wala sila mahadlok hinoon ipadayun ang ilang tinguha nga matabangan ang mga lumad og dili na mahaylo pa sa walhong kalihukan.
Sumala usab sa Hepe sa Lianga Municipal Police Station nga si P/Sr. Insp. Amus Moreno, giangkon niining wala pa sila makahimu ug imbestigasyon tungod kay gipa-clear pa nila ang nahitaboan sa military.
Kini dungan sa pagpasabot nga wala gelayon sila miadtu sa lugar tungod kay posibleng pa-on lang kini sa NPA ilabina karung nagkadool na ang ilang anibersaryo.
