BUTUAN CITY – Malaumon ang mga local historians sa Butuan City nga hingpit nang magmalampuson sa ilang claim nga sa siyudad nahitabo ang unang misa sa Pilipinas ug dili sa Limasawa, Leyte nga dugay nang nakalatid sa kasaysayan sa nasud.
Kini human sa hingpit nang pagkabalik sa tulo ka kampana nga gikuha sa amerikano gikan sa Balangiga, Eastern Samar.
Sigon pa ni Fr. Joeselo Amalla sa pakighinabi ning sibyahan, usa ka dakong importansiya sa kasaysayan sa Pilipinas ang pagkabalik sa gibansagang balangiga bells.
Sumala pa niini, ang maong kampana gigamit isip pag-alerto sa mga sundalo ugaling dunay pag-atake ang mga amerikano hinungdang nagmadaugon ang mga Pinoy sa maong giyera.
Kini ang rason sa kabililhon sa maong mga kampana nga maoy sukaranan sa kultura ug kasaysayan.
Pagbutyag pa ni Fr. Amalla, karung hingpit nang na-angkon pagbalik sa balangiga ang makasaysayong mga kampana, mas paningkamotan nga ma-angkon na sa hingpit nga sa Mazaua Island, Butuan City gipahigayon ang unang misa sa Pilipina.
Dugang pa sa local historian, dakong kaulawon nga ang Limasawa, Leyte ang gipadaog sa gobyerno bisan ug walay gipakitang ebidensiya
Gipahayag pa ni Fr. Amalla nga lig-on ang ilang gihawiran nga mga ebidensya sa ilang pamahayag, base na sa napalit niyang transcription sa chronicle ni Antonio Pigaffeta sa Milan, Italy niadtong 1996.
Sigon ni Fr. Amalla, mabasa sa page 135 sa libro nga gihimu ang unang misa sa Pilipinas sa isla sa Mazaua nga makita sa lokasyong 9-degree latitude ug gitambongan sa magsoon nga hari sa nasangpit nga lugar ug isla sa Butuan nga sila Kulambo og Siago.
Sa nasangpit nga libro usab ang unom ka higayon nga giila ang Butuan, pipila ka higayon usab ang Karaga, ug daghang higayon ang balanghay samtang 12 ka higayon ang Mazaua kumpara sa Limasawa nga wala nalakbitan bisan ug ka-usa man lang ni Pigafetta. (Rolan Janea)
