BUTUAN CITY – Gipa-imbestigahan na ni Agusan del Norte 2nd District Congressman Erlpe John Amante sa House Committee on Good Government ang kwestyunableng pag-raid sa panimalay ni Vice Mayor Glecerio Monton sa lungsod sa Jabonga sa maong lalawigan kondiin narekober ang usa ka granada sulod sa pansayan og pipila ka sachets sa gitu-uhang shabu.
Kini bisan pa man sa pagpahigayon na matud pa og imbestigasyon sa Regional Internal Affairs Service kon RIAS sa Police Regional Office kon PRO-13 ngadto sa raiding team nga gilangkuban sa mga sakop sa Provincial Intelligence Branch sa Agusan del Norte Provincial Mobile Force Company, mga personahe sa PDEA-Caraga og sa Jabonga Municipal Police Station,
Gikonsidera ni Congressman Amante nga maayong lakang ang pagpahigayon og imbestigasyon sa kapulisan apan dako ang iyang pagtuo nga pantalya lang ang tanan tungod kay padayon man ang pag-viral karon sa social media sa hulagway nga nagpakita sa granada sulod sa pansayan tupad sa mga hygiene kits kansa sigon sa mga netizens, usa ka binulok nga ideya sa pagtanom og ebidensya.
Sa eksklusibong pakighinabi ning sibyahan, nanghinaut na lamang ang opisyal nga unta wala’y hokus-pokus sa maong imbestigasyon dungan sa pagpasalamat sa kahigayunan nga duna’y CCTV nga makapamatuod sa ngil-ad nga binuhatan sa kapulisan nga magpamatuod nga planted ang gipasi-atab nga ebidensya sa raiding team.
Gikasubo sa kongresista ang kamatu-uran sa iyang nadiskubrehan nga daghan diay nga mga pulis nga buang kinsa giswelduhan sa probinsyal nga kagamhanan aron lang himuong goons sa mga pulitiko. (Beth Ruiz)
