BUTUAN CITY – Sa maka-usa pa, subling napamatud-an sa DXBR Bombo Radyo Butuan sulod sa 23 ka tuig niining pagserbisyo sa kahanginan, ang pagka-numero uno niining ginapaminawan sa katawhan ning siyudad og uban pang bahin sa Caraga Region og kasikbit nga mga lalawigan.
Kini human nag-number 1 ang sibyahan sa gihimong survey niadtong Oktubre ning tuiga. Sa gipagawas nga survey result, makita sa ranking nga nagsunod ning sibyahan ang DXBC – Radio Mindanao Network kon RMN og dayon ang DXBN Radyo Pilipinas.
Tungod niini nga laing kada-ugan, ipahinungod kini ning sibyahan og kinatibuk-ang Bombo Radyo Philipines network ngadto sa Kahitas-an og sa tanang tigpaminawan nga wala’y pu-as sa pagpaminaw sa tanang programa og drama ning sibyahan apil na sa pagsuporta sa tanang promos niini.
Ang tuig 2018 gikonsidera ning sibyahan nga puno sa grasya tungod kay una kining nakasakmit og kada-ugan ning tuiga sa 26th Kapisanan ng mga Brodkaster sa Pilipinas kon KBP human napiling Best Radio Newscast –Provincial category ang Bombo News and Views Morning Edition.
Gisundan kini sa pagkapili sa Good Morning Philippines isip ‘Best Educational Program sa 40th Catholic Mass Media Awards kon CMMA alang sa segment niining ‘Success Story’. (Beth Ruiz)
