BUTUAN CITY – Gipasakaan na og mga kaso ang besi-mayor sa lungsod sa Jabonga, Agusan del Norte human nakuhaan og usa ka fragmentation hand granade og 12 ka sachets sa gidudahang shabu dihang gilusad ang anti-illegal drug operations sa iyang pinuy-anan kaganinang alas-2:30 sa kaadlawon.
Apil sa mga narekober gikan sa pinuy-anan ni Vice Mayor Glecerio Monton, 45-anyos, minyo og residente sa Purok 4, Brgy. Poblacion sakop sa maong lungsod ang usa ka granada nga nahimutang sa servant’s quarter og 12 ka sachets sa suspected shabu nga mitimbang og 60-gramos og gibana-banang nagkantidad og 708-mil pesos.
Temporaryong gidetine sa Jabonga Municipal Police Station ang besi-mayor alang sa tukmang disposasyon samtang gipasaka na batuk kaniya sama sa paglapas sa Section 22 sa RA 9165 og RA 9516 pinaagi sa inquest proceedings.
Gihimo ang operasyon pinaagi sa hini-usang pwersa sa Provincial Intelligence Branch sa Agusan del Norte Provincial Mobile Force Company, mga personahe sa PDEA-Caraga og Jabonga Municipal Police Station. (Beth Ruiz)
