BUTUAN CITY – Tingkagol karon sa karsel sa Criminal Investigation and Detection Group kon CIDG-Caraga nga nakabase ning siyudad sa Butuan ang barangay kapitan sa Brgy. Wasian, lungsod sa Rosario, Agusan del Sur human nakuhaan og mga eksplosibo, mga armas og mga bala sa gilusad nga search operation kaganinang alas-sais sa buntag.
Naila ang nadakpang si Eduardo de Paz, 51-anyos, minyo, residente og kapitan sa Brgy. Wasian kinsa mudagan usab pagka-besi mayor sa umalabot nga May 2019 elections og gi-alegahang nagmintina og private armed group kon PAG og nabutang usab sa watchlist isip illegal drug protector sa Police Regional Office kon PRO-13.
Apil sa nadakpan ang isoon niining assistant department head sa Municipal Environment and Natural Resources Office kon MENRO nga si Nemisio de Paz, 53-anyos, minyo og ang barangay tanod nga si Felix Laurente, 67-anyos, biyudo, parehong residente sa maong dapit.
Nasayrang lima ka mga search warrants ang gi-serve sa maong ahensya uban sa lain pang mga law enforcement agencies ngadto sa mga suspek.
Nagkada-iyang klase sa mga bala, armas og eksplosibo ang nakumpiska sa tropa apil na niini ang usa ka kalibre 45 nga pistol, usa ka caliber .357 revolver, usa ka caliber .380 pistol, usa ka kalibre 38 nga pistol, usa ka kahon nga dinamita, walo ka mga blasting caps, mga holsters, baldoliers, ingon man mga bala og magazines sa kalibre 45 nga pistola, caliber .380, kalibre 38, caliber .357, caliber 30 og sa 9mm pistol.
Ang nakumpiskang mga butang gikostudiya na sa CIDG-Caraga uban sa mga nadakpang suspek alang sa tukmang disposasyon. (Beth Ruiz)
