BUTUAN CITY – Padayon pa ang imbestigasyon sa kapulisan sa San Francisco, Agusan del Sur aron ma-ila ang mga responsable sa pagpamusil nga miresulta sa pagkamatay sa usa ka lalaki og mi-angol usab sa usa ka lumad ning mi-aging alas-5:35 sa hapon.
Ang maong insidente miresulta usab sa pagkamatay sa usa sa walo ka mga suspek human nga nakabalos pa pagtiro ang na-angol nga lumad nga si Walter España kinsa mas naila sa tawag nga Datu Salacupan III, residente sa Sitio Santagan, Brgy. Lucac sakop sa maong lungsod.
Sa eksklusibong pakighinabi ning sibyahan, gibutyag ni P/Supt. Christian Rafols – information officer sa Police Regional Office kon PRO-13, pa-uli na unta ang mga biktimang sakay sa motorsiklo apan paghidangat nila sa Sitio Durian, gi-atangan na sila sa wala pa mailang mga suspek og gipamusil rason sa pagka-igo sa angkas ni Datu Salacupan nga si Ramil Ramon.
Daling mibalos pagpusil ang tribal chieftain nga miresulta usab sa pagkamatay sa usa sa mga suspek kinsa gi-ilang si Roger Detros, residente sa Lower Madapo Hills, Davao City samtang padayon pang gitambalan si Datu Salacupan kinsa anaa na sa luwas nga kahimtang.
Gidugang ni P/Supt. Rafols nga apil sa anggulong gitutukan sa kapulisan sa maong lungsod ang away sa yuta apan mas dako matud pa ang posibilidad nga ang mga rebeldeng New People’s Army ang mihimo niini human nakumpirma nga sa Davao City nagpuyo ang napatay nga suspek sukwahi sa mga insidente nga kung bangi sa yuta ang motibo, dapat residente ra usab sa maong lugar ang mibira kanila.
Mulig-on lang matud pa ang ilang imbestigasyon higayong makasulti na si Datu Salacupan kinsa padayon pang nagpa-alim sa balay-tambalanan. (Beth Ruiz)
