BUTUAN CITY – Padayon pa ang lawom nga imbestigasyon sa kapulisan sa Buenavista, Agusan del Norte aron ma-ila ang mga responsable og masuta ang motibo sa pagpusil-patay sa tulo ka mga kabanay nga Higaonon.
Naila ang mga biktimang sila Alfredo Timaquin Sr., 61-anyos og mga pag-umangkon niining sila Paka Pinatugao, 47-anyos og Pina Pinatugao, 48-anyos, pulos mulupyo sa Sitio Bagan, Brgy. Simbalan sakop sa maong lungsod.
Sa eksklusibong pakighinabi ning sibyahan, gibutyag sa imbestigador nga si PO2 Ricafort Gilbuena, nagtrabaho matud pa ang mga biktima sa 50-ektaryang luna nga gi-abangan sa Koreano nga si Ryoo Wang-hyow sa Sitio Labong sa susamang barangay.
Gikan matud pa sa ilang pagtrabaho ning mi-aging adlaw, wala na makapa-uli pa ang mga biktima rason nga gipangita na sila sa ilang mga kabanay sayo kagahapon sa buntag.
Napalgan ang ilang patay’ng lawas pasado alas-siete sa buntag sa kasikbit na nga yuta sa pamilya Tomaquin ra usab nga duna’y mga samad pinusilan gikan sa wala pa masutang klase sa armas.
Gipa-ilalom na sa ballistic examination ang narekober nga 24 ka mga wala na’y sulod nga gitirang cartridge cases sa gitu-uhang tag-as nga kalibre sa armas.
Hangtud karon, nagpabiling tanghaga alang sa pamilya sa mga biktima kung kinsa ang mihimo niini ngadto kanila ilabina nga wala matud pa sila’y nasayrang duna kini mga kaaway.
Bisan matud pa ang ka-ipon sa Koreano nga residente ra sa kasikbit nga barangay, wala’y nasayran nga duna’y naka-away ang ilang mga trabahante. (Beth Ruiz)
