BUTUAN CITY – Duha ang patay samtang usa ang angol sa duha ka motorsiklong nabanggaan sa kasugat nilang Mitsubishi Montero sports kaganinang buntag sa Purok 6, Brgy. Ampayon ning siyudad sa Butuan, human kini mi-overtake sa usa ka Nissan Navara.
Naila ang namatay nga driver sa unang motorsiklong si Raul del Rosario, residente sa Brgy. Canlanipa, Surigao City og trabahante sa Department of Transportation and Railways kon DOTr-Caraga samtang gipakisayran pa ang identity sa babayeng angkas niini kinsa patay usab human milagpot sa layo og gika-ingong buntis matud pa.
Angol usab ang driver sa ikaduhang motorsiklong nabanggaan sa Montero nga gimanehuan ni Vic Pag-ong, nga nailang si Ricky Castillo Epis.
Paglabay sa pila ka oras, mitahan sa Butuan City Police Station 4 ang wala gilayon mihunong sa dapit nga nahitabuan ang driver sa Navara nga si Russel Bulado Jr., residente sa Purok 2-B, Brgy. Ampayon, aron ipagawas ang tinuod nga panghitabo.
Saysay niini, gi-overtake-kan matud pa siya sa Montero rason nga nasugat sa Montero ang duha ka motorsiklo nga miresulta sa ngilngig nga aksidente.
Ang maong pamahayag ni Bulado Jr., gisuportahan usab sa usa ka indibidwal nga nakakita sa maong panghitabo. (Beth Ruiz)
