BUTUAN CITY – Gipamugos ni Catanduanes Provincial Director Chief Inspector Jovie Espenido nga kinahanglan og usa ka tawong duna’y konsensya ang ibutang sa Bureau of Customs.
Kini ang reaksyon sa kontrobersiyal nga opisyal human siya gihimong ehemplo sa usa ka tigpaminawan sa Bombo Radyo Butuan kinsa nagbutyag nga siya ang angayang ibutaang nga hepe sa BOC tungod kay madala niya ang iyang mga tawo og aron mahunong na ang ilegal nga mga transakyon sa maong ahensya sa gobyerno.
Sa eksklusibong pakighinabi sa Bombo Radyo Butuan, gitin-aw ni Chief Inspector Espenido, nga bisan kinsa mamahimong ibutang sa BOC basta ang importante duna lama’y kahadlok sa Ginoo tungod kay ang BOC sama matud pa sa usa ka pamilya nga nagkinahanglan og maayong plano og pagdumala sa usa ka amahan.
Dili na matud pa kinahanglan nga siya pa ang ibutang sa bisan asang ahensya sa gobyerno, tungod kay makaya kini ni bisan kinsang makahatag og maayong serbisyo sa mga tawo nga dili mu-una sa ilang personal nga interest. (Melody Valledor)
