BUTUAN CITY – Nag-iyahay og post sa social media sa ilang gibating kahadlok og mga kabalaka ang mga residente sa lungsod sa Hinatuan, Surigao del Sur human gitay-og sa sunod-sunog nga igong gikusgon sa linog kagabii og gisundan pa sa mga aftershocks.
Base sa gipagawas nga earthquake bulletin sa Phivolcs, unang natala ang magnitude 4.2 nga linog pasado alas-8:55 kagabii sa gilay-ong 55-kilometros sa sidlakang bahin sa maong lungsod kansa tectonic in origin.
Gisundan gilayon kini sa 26 ka mga aftershocks hangtud alas-6:08 kaganinang buntag kondiin ang pinakakusog natigayon pasado alas-9:41 kagabii nga natala sa magnitude 5 rason nga nabati ang intensity II nga pagtau-og sa mga lungsod sa Lianga og Cagwait apil na sa Bislig City nga parehong sakop sa Surigao del Sur samtang intensity III usab sa mismong lungsod sa Hinatuan og Rosario sa Agusan del Sur.
Gisundan pa kini sa magnitude 5.3 pasado alas-10:40 kagabii kondiin intensity V ang gikusgon sa linog sa Hinatuan og intensity III usab sa Bislig City apil na sa mga lungsod sa Cagwait og Lianga sa susamang lalawigan.
Magnitude 5.1 usab ang mitay-og pasado alas-10:51 kagabii kondiin nabati ang intensity III nga gikusgon sa Bislig City. (Beth Ruiz)
