BUTUAN CITY – Politically motivated matud pa ang pagpasaka og kaso ni retired journalist Salvador ‘Bads’ Cupin ngadto sa Ombudsman batuk sa tanang mga local officials ning siyudad sa Butuan sa pagpanguna ni Mayor Ronnie Vicente Lagnada.
Sa eksklusibong pakighinabi sa Bombo Radyo Butuan, gibutyag Konsehal John Gil Unay nga sa iyang panglantaw isip usa sa 12 ka mga respondents, duna’y bahid sa pulitika ang maong kaso tungod kay giduso kini niadto lang Agusto ning tuiga samtang nagkaduol ang eskedyol alang sa filing sa certificate of candidacy niadtong gustong mudagan sa 2019 mid-term elections.
Gipasabot ni Konsehal Unay nga duna’y kayugot ang reklamante sa kasamtangang administrasyon human nga gipasakaan siya niini og kasong libelo tungod sa pagmantala matud pa niini og maka-uulaw og wala’y basehang artikulo kalabot sa proyekto nga maghatag unta og maayong supply sa tubig ngadto sa mga Butuanons.
Nag-atubang matud pa og kasong sibil og kriminal si Cupin sa managlahing local courts ning siyudad tungod sa iyang mga komentaryong gimantala sa lokal nga mantalaang Centro.
Sigon ni Konsehal Unay, dakong bakak ang pasangil ni Cupin nga gi-abandona sa lokal nga kagamhanan ang Polysports Complex nga nahimutang sa Brgy. Tiniwisan tungod kay wala pa matud pa kini ma-turn over sa contractor ngadto sa city government ubos sa kadumalahan kaniadto ni kanhi Butuan City Mayor Ferdinand Amante Jr.
Kini taliwa nga dul-an na matud pa sa 300-milyunes pesos ang pundong nagasto sa lokal nga kagamhanan alang sa maong proyekto.
Ang maong kantidad, mas taas matud pa kumpara sa gigahin nga 230-milyunes pesos alang sa konstruksyon sa natapos na nga Tagum Sports Complex.
Dugang ni Unay nga nasayop sa paggukod si Cupin sa tawong angayang suktan niini tungod kay ang kanhi administrasyon ang nag-award sa kontrata sa maong proyekto ngadto sa JD Legazpi Construction firm kansa mao unta matud pa’y gikasuhan ni Cupin.
Gipanghimakak usab niini ang alegasyon ni Cupin nga nagkunsabo matud pa silang mga city officials nga dili tibawason ang maong proyekto dungan sa pagklaro nga desisyon kini sa Commission on Audit kon COA tungod sa padayong pag-audit sa maong proyekto.
Giklaro sa konsehal nga duha ka legal nga babag ang hinungdan nga wala una gipadayon ang konstruksyon niini apil na ang pag-audit sa COA sa gika-ingong anumalusong proyekto. (Beth Ruiz)
