BUTUAN CITY – Gi-andam na ang kasong ipasaka batuk sa ama-ama nga mikunsumo sa iyang 4 ka mga step-daughter nga mga minor-de-edad sa hilit nga lugar sa may Sitio Tambunon, Barangay Bolhoon lungsod sa San Miguel, Surigao Del Sur.
Sumala pa ni P/Chief Insp. George Carino, Hepe sa San Miguel Police Station, seguradong dili na makagawas pa sa prisuhan ang suspetsadong si Michael Laurente Garcia, 29-anyos nga usa ka maguuma. Pagbutyag pa sa opisyal, namenyu ang maong lalaki sa inahan sa upat ka mga biktima nga managsuon nga pulos gipanglugos sa suspek.
Nahimong biktima niini ang 17-anyos, 15-anyos, 12-anyos ug 11-anyos. Saysay pa sa hepe, dugay nang gibuhat sa suspek ang linoob nga kremin apan nabulabog lang kini sa dihang nagdugo ang kinatawo sa 11-anyos nga sa sige ug pangutana sa inahan, mitug-an kini nga gihilabtan siya sa iyang step-father.
Gisaysay pa sa 11-anyos nga niadtong Oktubre 14 sa dihang gi-uban matud pa siya sa iyang ama-ama nga manguha ug baki apan natingala siya nga nagkuha kini ug dahon sa saging ug gibanig dayun ti-on kaniya sa sundang hinungdang milampos gayud ang suspek sa pagpanamtamas kaniya.
Tungod sa pagbulgar sa biktima, misumbong na usab ang 3 ka mga igsoon niini nga sila usab gilugos sa step-father sa makadaghang higayon.
Gane, napugos sa pagmenyu ang 15-anyos aron lang makalikay sa iyang ama-ama apan bisan ug mabdos na kini, pugsanon gihapon siyang gilugos sa suspek.
Tungod sa maong rebelasyon, daling gipahibalo sa inahan si Datu Rico Maca, ang Indigenous Peoples Mandatory Representative kon IPMR sa maong lungsod nga maoy nakig-alayon na usab sa kapulisan ug militar aron masikop ang suspek.
Malampusong nasikop ang suspek nga nakuhaan pa ug marijuana apan nagnegatibo kini sa gihimung drug test. Gipaneguro sa hepe nga mapasaka na nila ang kasong lugos ug paghupot sa ilegal nga drugas sulod ning semanaha ugaling makompleto na nila ang gihulat nga birth certificate sa mga bata.
Hatagan usab nila ug tabang ang mga biktima aron maminusan ang trauma nga ilang nasinatian.
