BUTUAN CITY -Hatagan og official commendation sa Sangguniang Panlungsod ang Butuanon beauty queen nga si Marie Chrislyn Que tungod sa iyang pagdaog sa titulong Miss Chinatown 2018 nga gipahigayon sa kauluhan.
Kini human gipapasar sa konseho ang SP resolution No. 371-2018 kansa nagdayeg kang Que – anak nila Mr. og Mrs. Jimmy Que human nasakmit ang maong titulo kansa giduso ni Konsehal Rema Burdeos.
Mahinumdumang sila Marie Chrislyn Que, 23-anyos og Moises Cleon Limyuen mao ang napiling 2018 Mr. and Miss Chinatown, kondiin ilang napilidi ang ubang mga Chinoy contestants. Ilang nabulsa ang 200-mil pesos nga cash prize og mga regalo gikan sa mga sponsors. Tungod niini nga kada-ugan, si Que ang mu-compete sa 2019 Miss Chinese International nga himuon sa sayong sunod tuig sa wala pa masayring venue.
Ang second runners-up mao sila Carly Chua og Brian Christopher Gocheco samtang first runners-up usab sila Martin Leonard Chua og Sabrina Ng.
Apil sa mga special award winners alang sa Mr. and Miss Photogenic sila Martin Chua og Patricia Tan; Mr. and Miss Congeniality sila Robert Tanchip og Sabrina Ng; Best in Talent sila Frances Que og Martin Chua; Best in Cultural Costume sila Jason Dy Tan og Chinzen Viernes; Best in Formal Wear sila Gocheco og Ng og Best in Swimwear sila Gocheco og Que. (Beth Ruiz)
