BUTUAN CITY – Dakong garbo alang sa mga taga-Bislig City, Surigao del Sur human midalikyat sa ilang siyudad ang unom ka mga kandidata sa Miss Earth 2018 alang sa ilang eco-tour.
Apil niini ang kandidata sa Guyana nga si Xamiera Kippins, Miss Liberia Joicet Jarty Foday, Miss Mexico Melissa Flores, Miss Malta Yanika Azzopardi. Miss Serbia Nina Jovanovic og Miss New Zealand Jhayla Hughey.
Sigon ni Mayor Librado Navarro sa eksklusibong pakighinabi sa Bombo Radyo Butuan, mibalik na kaganina sa kauluhang Manila ang maong mga kandidata human sa sunod-sunod nila nga pictorials sa mga nindot nga tourist destinations ilabina sa Tinuy-an Falls nga gikonsiderang Niagara Falls sa Pilipinas.
Apil sa nabisitahan sa maong mga kandidata ang ilang City Organic Agriculture Fisheries Complex kansa gi-ila nang agro-tourism site, mga tunghaan sa elementarya og sekondarya, sandbar og nangaligo sa Lawigan beach resort.
Positibo ang mayor nga tungod sa paghidangat sa maong mga kandidata, mas ma-promote na dili lang dinhi sa Pilipinas kondili sa tibuok kalibutan ang ilang lugar tungod kay ipakita man atol sa coronation night sa maong pageant ang gihimong mga kalihukan sa ilang siyudad.
Nasayrang niadtong tuig 2016, apil usab ang ilang siyudad sa gi-tour sa mga kandidata sa susamang pageant. (Beth Ruiz)
