BUTUAN CITY – Kumpirmado nang mag-agbat sa congressional race sa ikaduhang distrito sa lalawigan sa Agusan del Norte sila incumbent Congressman Erlpe John Amante og incumbent Governor Ma. Angelica Rosedell Amante-Matba.
Kini human nga hingpit nang nagduso sa iyang certificate of candidacy kon COC ang gobernadora alang sa pagka-kongresista kaganina didto sa Commission on Elections kon COMELEC-Agusan del Norte.
Mahinumdumang unang nagduso sa iyang COC kagahapon si Congressman Ping Amante dungan usab sa kinatibuk-an nilang provincial slate sa Kusog Pagbabago. Una nang gibutyag sa kongresista nga magpadayon ang iyang planong subling mudagan sa maong posisyon bisan si kinsa pa ang mu-atbang kaniya.
Samtang gibutyag usab sa gobernador nga hugot na ang iyang baruganan nga atbangan ang iyang maguwang sa bisan unsang posisiyong iyang daganan, bisan pa man og ma-usab ang huna-huna niini og magdesisyong mukanaog pagka-gobernador.
Iyang gipasabot nga dili musalir ang pangandoy sa mga tawo nga maghi-usa sila og pwersa og masayang usab ang oportunidad kung silang mga lider dili magkasinabot. Kini tungod kay mabalewala matud pa ang ilang obligasyon ngadto sa mga Agusanon kung managlahi ang ilang baruganan og prayuridad sa pagserbisyo. (Beth Ruiz)
