BUTUAN CITY – Giklaro ni Jonnel Tante, amahan sa duha ka managsoong bata nga nasunog-patay sa Brgy. Camayahan ning siyudad sa Butuan nga wala’y doktor nga nag-atiman sa iyang mga anak dihang ila kining gidala sa Butuan Medical Center niadto pa lang Sabado sa udto sa rasong pagka-Dominggo na matud pa kini sa buntag mu-duty.
Tungod niini, bugtong nurse lang ang nag-atiman sa iyang anak pinaagi sa gi-inject nga tambal sa 1st degree burns nga ila matud pang na-angkon.
Iya kining gipa-inom og tubig human mi-uyon ang nurse apan wala na maka-agwanta ang lawas niini pagka-alas tres sa kaadlawon rason nga nakabsan kini sa kinabuhi og nasundan sa laing usa paglabay sa duha ka oras.
Wala matud pa’y makatambag kanila nga i-refer sila sa laing ospital ilabina sa Davao City tungod sa kawala’y naka-duty nga doktor.
Sa eksklusibong pakighinabi ning sibyahan, gibutyag ni Tante nga gikan sa iyang pagsag-ob og tubig nga duna’y gilay-ong tunga ka kilometros gikan sa ilang pinuy-anan, mao na lama’y iyang nakit-an nga nagdagan-dagan na padulong sa balay sa iyang bilas ang iyang duha ka mga anak nga nagkapaso-paso na sa nagkada-iyang parte sa lawas.
Dihang ilang gidala sa ospital ang mga bata, iya pang napangutana ang iyang kamaguwangang anak kalabot sa maong panghitabo, kondiin nakatug-an matud pa kini kaniya nga siya ang nagpasiga sa lighter nga ilang gitapot sa banig, habol og moskitero rason sa pagsilaab sa kalayo.
Nagtuo ang amahan nga gikab-ot sa mga bata ang lighter nga iyang gibutang sa ibabaw lang nga bahin nga distansya matud pa gikan sa nahimutangan sa iyang mga anak. (Beth Ruiz)
