‘Clash in Butuan’ sa mga international og local boxers ugmang adlawa, gi-atangan na

BUTUAN CITY – Ugma nang adlawa, Dominggo sa alas-tres sa hapon ang gi-atangang ‘Clash in Butuan,’ usa ka international boxing event nga mag-feature sa away sa mga boksingerng gihuptan sa MP Promotions nga gipanag-iyahan ni world boxing champion og Senador Manny Pacquiao batuk sa mga langyaw’ng boksinger.

Sa eksklusibong pakighinabi ning sibyahan, gibutyag ni Butuan City Councilor Cromwell Nortega – chairman sa Committee on Sports sa Sangguniang Panlungsod, all set na ang lokal nga kagamhanan ingon man ang MP Promotions og mga langyaw’ng boksingero sa ilang panag-agbat nga himuon sa Father Saturnino Urios University kon FSUU.

Dugang ni Konsehal Nortega, usa kini ka maayong kalihukan nga dili angayang palabyon sa mga Butuanon tungod kay kini ang unang higayon nga makasaksi sila og international boxing fights kansa libreng makita sa tanang mga boxing affeccionados.

Gidugang pa sa konsehal nga apil sa inisyal nilang nasabutan tali sa mga opisyal sa MP Promotions nga tabangan ang Butuan city government nga makabaton og boxing stable aron duna’y lugar nga mabansayan ang mga potential boxers ning rehiyon.

Gawas pa kini sa posibleng paghatag pa sa mga potential boxers og mga maayong away sa umalabot nga panahon nga ubos na unya sa pag-atiman sa stable sa fighting senator. (Beth Ruiz)