BUTUAN CITY – Nagsubo karon ang Diocese sa Tandag City sa Surigao del Sur tungod sa pagkamatay sa ilang pinaka-unang obispo nga si retired Redemptorist Bishop Ireneo Amantillo ning mi-aging adlaw tungod sa pag-antos niya sa prostate cancer.
Ang 83-anyos nga obispo nga maoy mikampyon sa pag-asdang sa katungod sa mga kabus, apil na diha sa kamugnaan og paghatag og edukasyon ngadto sa mga lumads, ingon man integridad sa palibot, namatay pasado alas-8:25 ning mi-aging buntag sa Redemptorist House sa Cebu City.
Nasayrang si Amantillo ang unang obiso sa Tandag City og nagdumala sa maong diocese sulod sa 23 ka mga tuig. Nasayrang natawo si Bishop Amantillo niadtong Disyembre 10, 1934 sa Alimodian, Iloilo og na-ordinahan isip usa ka Redemptorist priest niadtong Disyembre 16, 1962.
Pagka-Enero 1976, gitudlo siyang Auxiliary Bishop sa Archdiocese sa Cagayan de Oro og paglabay sa duha ka tuig, natudlo siyang unang bishop sa Tandag hangtud sa iyang pagretiro niadtong tuig 2001.
Si Amantillo ang ikapito nga Filipino prelate nga namatay ning tuiga sunod nila retired Bishop Jesus Varela sa Sorsogon, retired Auxiliary Bishop Zacharias Jimenez sa Butuan, Bishop Jose Oliveros sa Malolos, retired Bishop Camilo Gregorio sa Batanes, retired Archbishop Edmundo Abaya sa Nueva Segovia, og Bishop Wenceslao Padilla sa Mongolia. (Beth Ruiz)
