BUTUAN CITY -Gilantaw pa sa kapulisan sa Rosario, Agusan del Sur kung duna’y bahid sa pulitika ang motibo sa pagpusil-patay sa kapitan sa Barangay Poblacion nga si Julie “Onyot” Chua kinsa gideklarang dead on arrival dihang gidala sa ospital.
Nasayrang naka-angkon og mga samad-pinusilan sa dughan, kilid og tiil si Chua kinsa gipusil samtang anaa sa terrace sa iyang pinuy-anan ning mi-aging gabii.
Blangko ang pamilya Chua kung kinsa ang mihimo niini ilabina nga naila kining matinabangon og wala’y kaaway.
Narekober sa dapit nga nahitabuan ang napulo ka basiyo sa bala og pito ka mga slugs sa kalibre .45 nga pistola.
Padayon pa ang lawom nga imbestigasyon sa kapulisan aron masuta ang motibo sa maong kremin ilabina nga aang biktima kinsa kanhi bise-mayor sa maong lungsod, subling mudagan sa susamang posisyon karong Mayo 13, 2019 nga mid-term elections.
