BUTUAN CITY – Subay sa pag-obserba sa tibuok kalibutan karong adlawa sa World AIDS Day, gisugdan kaganinang buntag sa sa Department of Health kon DOH-Caraga ang paghanyag og libreng mobile HIV testing og voluntary counseling. Kini ang highlight nila niini nga kalihukan pinaagi sa paglibot nila sa mga dagkong sekondaryang tunghaan, kolehiyo og unibersidad ning siyudad sa Butuan aron pagpahigayon og lecture ingon man advocacy campaign 101.
Sigon ni Joy Diana Cervantes – HIV Regional Program Coordinator, tema sa maong kasa-ulugan ning tuiga ang ‘Hands Up for HIV Prevention’ og aron masegurong malikayan na ang paspas nga pagkaylap sa makamatay nga sakit, subsob usab ang ilang gihimong information dissemination pinaagi sa pagmontar og mga booths diha sa mga tunghaan.
Gibutyag sa opisyal nga as of October 15 ning tuiga, ang Caraga Region, mitala na og 313 ka mga kaso sa HIV og gila-umang musaka pa.
Apan kung magpahiling og sayo ang matag-usa, dako ang kahigayunang mapugngan ang pagkaylap pa sa maong virus diha sa ilang lawas tungod sa sayong treatment usab nga ihatag kanila.
Iya usab nga gipahibalo sa tanan nga available ang HIV testing og counseling sa ilang buhatan ingon man ang tibuok kinabuhi nga treatment niadtong mga nagpositibo niini kansa ma-avail sa upat ka mga lalawigan ning rehiyon sa Caraga. (Beth Ruiz)
