BUTUAN CITY – Gihupay sa Armed Forces of the Philippines ang kahadlok ug kabalaka sa mga residente nga madamay sa natigayong engkwentro kagahapon sa hapon sa Loreto, Agusan del Sur.
Gibutyag ni Major Rodulfo Cordero Jr. ang Civil Military Operations kon CMO officer sa 401st Brigade Philippine Army, nga naka-agbat sa tropa sa 26th IB, ang kapin kon kulang 40 ka elemento sa New People’s Army bandang alas 2 sa hapon sa barangay Kauswagan sa maong lungsod.
Sa gipahigayong hot pursuit operations narekober sa militar ang usa ka AK47 rifle, mga buhing bala, Improvised Explosive Device kon IED, ug himang medikal sa mga rebelde.
Hinuon walay narekober sa kasundalohan nga patay’ng lawas apan base sa nakit-ang pat-ak sa dugo sa encounter site posibleng dunay angol sa han-ay sa mga rebelde.
Sa pikas bahin gikabutyag ni Maj. Cordero nga dunay usa ka tulonghaan sa Barangay Kauswagan ang naalarma apan gipaneguro sa opisyal nga dili pasagdan ug itugot sa militar nga madamay ang mga yanong sibilyan.
Giklaro usab ni Major Cordero nga walay nahagsa sa ilang mga neresponding chopper sa maong panghitabo. (Rolan Janea)
