BUTUAN CITY – Nagpadayon karon ang 24th Siargao Cloud 9 Surfing Cup human kini gibuksan kagahapon sa buntag didto sa Cloud 9 Surfing site sa Barangay Catangnan, General Luna sa Siargao Island, Siargao del Norte.
Ang maong kompetisyon nga matapos karong Oktubre 4, gisalmutan sa 128 ka mga international surfers gikan dinhi sa nasud sa Pilipinas apil na sa Estados Unidos, New Zealand, Australia, France, England, Hawaii, Indonesia, Japan, Mexico og Tahiti.
Sigon ni World Surf League kon WSL Australasia general manager og event director Steven Robertson, gi-upgrade na kini ngadto sa WSL Qualifying Series (QS) 3000 rated event kansa nagpasabot nga apilan kini sa mga gitawag nga biggest up og coming stars sa surfing aron palig-unon ang ilang kaugalingon pinaagi sa pagkuha og spot sa elite Championship Tour (CT).
Tinguha ni Robertson nga mapadayon og mapalambo pa ang laing WSL event sa rehiyon sa Asya.
Nasayrang kini ang pinakadakong tinuig nga sporting event sa Pilipinas kondiin makadawat og 75-mil dolyares kon kapin 4-milyunes pesos ang mamahimong kampyon.
Nagpadayon karon ang round 4 nga duna’y walo ka mga heats kondiin ang mudaog nga upat ka mga surfers maoy mu-away sa round 5 alang sa quarterfinals. (Beth Ruiz)
