Nagsungag nga single motor ug bus sa Placer, Surigao Del Norte, duha patay
BUTUAN CITY – Gihikay na ang kasong ipasaka batuk sa drayber sa usa ka bus human kini nalambigit sa disgrasya sa kadalanan nga mikalas sa duha ka kinabuhi kaganinang ala1:45 sa hapon sa national highway sa may Barangay Bugas-bugas, sakop sa lungsod sa Placer, Surigao Del Norte.
Sigon ni P/ Sr. Insp. Erwin Cordano, Hepe sa Placer Municipal Police Station, nagsumikad sa Bad-as, Placer og padulong unta sa sentrong bahin ang usa ka single motor apan pag-abot sa nahitaboan, nakasungag niini ang bus nga gikan sa Tandag City ug padulong unta sa Surigao City.
Misangpot kini sa kamatayon sa duha ka sakay sa single motor nga nailang sila Algen Kenyo nga taga Jabonga, Agusan Del Norte ug Felix Balansag Raagas, residente sa Alegria, Surigao Del Norte.
Saysay pa sa hepe nga paspas ang dagan sa single motor nga milapas sa iyang dalan og nakasungag niini ang pasugat nga bus diin nasulod sa ilalom sa bus ang duha ka biktima hinungdang nalatayan kini sa sakyanan og nagkabali-bali ang kalawasan sa mga niini nga miresulta sa ilang kamatayon.
Sa karun padayon pang gipaabot ang mga kabanay sa biktima human niini gipahibalo pinaagi sa social media.
Samtang gikustudiya usab sa police station ang duha ka sakyanan lakip na ang drayber sa bus nga si Richard Malahugang nga taga Km-10 Surigao City apil na ang conductor.
Gipahibalo na usab ang kompanyang Bachelor Express mahitungod sa maong panghitabo.
