BUTUAN CITY – Wala na makagawas pa gikan sa buhatan sa National Bureau of Investigation kon NBI-Caraga ang usa ka lalaking nagkuha og NBI clearance human nasuta nga usa kini saa rebeldeng New People’s Army kon NPA nga duna’y gi-atubang nga patong-patong nga kaso.
Naila ang nadakpan nga si Edwin Paulo Cinto, 36-anyos, residente sa Purok Tanguile, Brgy. Pangabugan ning siyudad sa Butuan.
Sigon ni head agent Anthony Yu, miduol matud pa kaniya ang suspek pasado alas-dies kagahapon sa buntag aron mangayo og clearance.
Apan dihang gisusi ang iyang records dinhi nasuta nga duna siya’y standing warrants of arrest sa mga kasong murder og multiple attempted murder nga anaa sa Branch 2 ingon man kidnapping og serious illegal detention nga anaa sa Branch 3 sa Regional Trial Court sa Hall of Justice sa Brgy. Libertad ning siyudad. (Beth Ruiz)
