BUTUAN CITY – Gikumpirma ni Surigao City Councilor Rice Recabo nga wala pa naka-abot sa Region 12 si Kabus Padatoon kon KAPA religious organization founder Pastor Joel Apolinario, napatawag na kini sa ilang city council base na usab sa hangyo sa mga concerned persons nga nakolektahan niini og kwarta.
Sa eksklusibong interview sa Bombo Radyo Butuan, gipadayag ni Konsehal Recabo nga nagdesisyon silang ipatawag si Apolianario human nila nabasa ang advisory sa Department of Interior and Local Government kon DILG og Securities and Exchange Commission kon SEC nga nagdili sa publiko nga makig-transaksyon sa KAPA sa rasong dili kini otorisadong mangolekta ig kwarta.
Apil sa mga nagpa-abot sa ilang mga concerns ang mga kabanay sa ilang mga constituents nga taga-Bislig City.
Dugang pa ni Recabo, mitambong sa ilang gipatawag nga pagdungog si Apolinario kondiin gipadayag niining usa sila ka religious organization og duna’y tawong naghatag kanila og donasyon nga iya matud pang ipang-apod apod sa ilang mga miyembro.
Sa panig usab sa city council, ilang gihatagan og precautionary measure ang mga tawong misulod og musuluray pa sa organisasyon nga kinahanglang nasayod sila sa ilang gisudlan og usab sa teminong donasyon.
Mahinumdumang kapin sa usa ka buwan nga nahimong sentro sa isyu sa Bombo Radyo Gensan si Pastor Apolinario tungod sa mga reklamo sa mga tawong iya matud pang gipang-ilad pinaagi sa pagpangayo kanila og dakong kantidad sa kwarta bugti sa saad nga patungan kini og 30-porsiento. (Beth Ruiz)
