BUTUAN CITY – Gikumpirma ni Surigao del Sur Police Provincial Director Sr. Supt. Francisco Dungo nga duna na sila’y nadakpang gikonsidera nilang apil sa mga persons of interest nga mipusil-patay sa asawa ni Bislig City Mayor Librado Navarro nga si Carmencita.
Sa eksklusibong interview sa Bombo Radyo Butuan, gipadayag sa opisyal nga ilang nadakpan ang wala pa panganling suspek sa gihimong follow-up operations kondiin nakuhaan pa kini og dili lisensyadong armas rason nga gipasakaan siya og kasong illegal possession of firearms.
Dugang pa ni Dungo, ipa-identify pa nila sa mga nakasaksi sa maong hitabo kung kini ba ang mipusil-patay sa 62-anyos nga first lady sa maong siyudad.
Gawas sa nadakpang suspek, duna pa’y laing mga persons of interest silang gibantayan.
Samtang karong dili pa kaayo madisturbo sa kapulisan ang pamilya Navarro tungod sa paghaya pa sa biktima, gipadayag sa opisyal nga duna na sila’y duha ka mga composite sketch nga nakuha kansa dugangan pa sa ilang technician pinaagi sa pag-abag sa mga saksi. (Beth Ruiz)
