BUTUAN CITY – Parehong dead-on-the-spot ang tulo ka mga lalaking sakay sa traysikol human midaro sa nakasugat nga PhilTranco Bus pasado alas-6:35 kagabii sa may Purok Narra, Brgy. Quezon, Surigao City.
Naila ang mga biktimang sila Celeste Señahan, Gary Aguila, parehong 43-anyos og mulupyo sa Brgy. Cagniyog og ang driver nga si Arthur Manlimos, residente sa Capitol Homes, pulos sakop sa Surigao City.
Sa pakighinabi sa Bombo Radyo Butuan, gibutyag ni P/Supt. Diomedes Cuadra – hepe sa Surigao City Police Station, gikan matud pa sa Brgy. Sison, ang mga biktima og pauli na unta.
Pag-abot sa tulay nga bahin, mi-overtake sila sa usa ka sakyanan diin ilang nakasugat ang bus nga gimanehuan ni Alfonso Ledesma, 43-anyos og residente sa Brgy. Poblacion, Panganiban, Camarines Norte.
Tungod sa kakusog sa impact nga hatud sa kusog usab nga pagpadagan sa traysikol, halos nadugmok na kini samtang napaksi usab ang kilid nga bahin sa atubangan sa bus og nanglangpot pa ang mga biktima nga miresulta sa pagbaton nila og mga bali sa lawas og paggawas sa utok nga miresulta sa hinanali nilang kamatayon. (Beth Ruiz)
