BUTUAN CITY – Pulitika karun ang nakitang motibo sa kapulisan sa pagpusil-patay sa asawa sa alkalde sa Bislig City alas 7:00 kagabi-i sa may Poblacion, Bislig City, Surigao del Sur.
Sigon ni P/Chief Insp. Ephraim Negrenio sa Bislig City Police Station, wala silay nakitang dunay nakaaway ang biktimang si Carmencita “Tita” Tembling Navarro, 62 anyos ang asawa ni Bislig City Mayor Librado C. Navarro.
Apan dunay plano ang biktimang mudagang Mayor sa umaabot nga 2019 midterm election puli sa iyang banang last term na karun isip alkalde.
Una nang gideklarang Dead-on-arrival sa Bislig City Hospital ang biktima human kini gipusil sa ulo sa wala pa mailang mga suspitsado nga sakay sa single motor cycle.
Nasuta nga samtang nitabang ang biktima sa pag plastar sa mga decoration alang sa pagpangandam sa grand opening sa Bay Walk ugmang adlawa Lunes, kalit lang nga nabati ang kusog nga boto sa armas gikan sa mga suspetsado diin naigo na sa ulo si Mrs. Navarro.
Human sa insidente daling misibat ang mga suspetsado sakay sa single motorcycle padulong sa Mangagoy sa samang probinsiya.
Sa karun padayon pa ang imbestigasyon samtang sa gihimung checkpoints dunay nadakpan silang posibling dunay kalabutan sa maong pagpamusil.
