BUTUAN CITY – Nagdeklara na og state of emergency ang North Carolina sa Estados Unidos subay sa gikatakdang pag-landfall sa bagyong Florence.
Sa eksklusibong pakighinabi sa Bombo RadyoButuan kang Bhombie Olaivar Bacani, lumad nga taga-Nasipit, Agusan del Norte og pharmacy technician sa La Fayetteville, North Carolina, gibutyag niining gidid-an na silang maglakaw-lakaw o kaha magmaneho og sakyanan.
Kini tungod kay ang kasikbit nilang mga siyudad duna na ma’y gipatumang curfew sugod sa alas-siete sa gabii.
Sirado na matud pa ang mga dagkong tindahan og mga grocery stores tungod sa panic buying kondiin gihurot na kini pagpangompra sa katawhang naneguro nga dili mahutdan og supply sa pagkaon, tubig-mainom og medisina.
Sukad-masukad, karon lang niya nabati ang kahugot sa pagpangandam nilang katawhan tungod kay bisan ang parmasyang iyang gitrabahuan, karon lang nagsira.
Gani, sila gipapa-uli og sayo aron dili matud pa ma-abtan sa curfew.
Sa pagkutlo niini nga balita, ila nang nabati ang kusog nga ulan og huros hangin bisan og wala pa nag-landfall ang bagyo.
Gi-deploy na usab ang kasundaluhan aron muhimo sa kinahanglanong rescue operations.
Bisan siya, mihikling na sa mas luwas nga lugar tungod sa pond sa iyang balay nga hapit nang mu-overflow.
Gani ang ilang parmasya, nag-stockpile na og mga medisina aron duna’y makuha panahon sa panginahanglan. (Beth Ruiz)
