B UTUAN CITY – Gilugwayan pa hangtud ning adlawa ang suspension sa klase sa tanang lebel sa Surigao Del Norte ma-pribado man o pampublikong tunghaan.
Kini ang gideklara ni Governor Sol Matugas tungod na usab sa epekto sa daot nga panahon human misulod sa Pilipinas ang Bagyong Ompong nga nagpakusog sa Hanging Habagat.
Una nang gisuspendi kagahapong adlawa ang klase sa Preschool ngadto na sa Elementaryang lebel tungod sa kusog nga pag-ulan nga posibling maka-trigger sa pagbaha og pagdahili sa yuta.
Gimanduan na usab ang tanang Municipal Disaster Risk Reduction Officers og Barangay Disaster Risk Reduction Management Council sa Surigao Del Norte nga pahugtan ang monitoring ilabina sa mga daplin sa baybayon dungan sa pag-abiso sa mga mananagat ug kadtong mga gagmay nga sakyanang pandagat nga dili na molawig pa aron maseguro ang ilang kaluwasan.
Sa gipahigayong CDRRMC- Emergency Meeting gipa-activate na usab 24/7 ang command center samtang naka-standby sa posibling mobilisasyon ang tanang logistics.
Mahinumdumang misulod sa Pilipinas kagahapon sa alas 3:00 sa hapon ang Super Typhoon Ompong.
