BUTUAN CITY – Tungod sa dili madawat nga taras dihang gikulata ang usa ka manglitsunay og baboy tungod lang sa hupyak nga baboy’ng iyang gipalitson, gi-dismiss sa regional chief sa PRO-13 ang usa ka sakop sa Butuan City Police Office kon BCPO.
Naila ang gi-dismiss nga si PO2 Narzal Muñez, 38-anyos, minyo kinsa nadestino sa Butuan City Public Safety Company ubos sa BCPO.
Mahinumdumang mireklamo sa Butuan City Police Station 4 ang manglitsunay nga si Armelito Soriano, 40-anyus, minyo, og residente sa Purok 4, Brgy. Ampayon ning dakbayan tungod sa pagkulata sa maong pulis kaniya.
Nasayrang nagpalitson ang maong pulis ngadto sa biktima og dihang gikuha na niya kini, iyang gikasuko ang migamay matud pang litson gumikan sa gikuha matud pang lumo og gusok niini kansa gipanghimakak sa biktima sa rasong gamay nang daan ang maong baboy,
Dinhi na siya gihapak og armas sa iyang ulo og gikulata atubangan sa iyang asawa og anak.
Gipaboran sa Internal Affairs Service sa PRO-13 ang reklamong physical injury nga gipasaka sa biktima og tungod sa mas gipahugtan karong kampanya sa PNP nga dili i-tolerate ang mga binuhatan sa mga abusadong pulis, gipirmahan gilayon ni P/Chief Supt. Noli Romana ang dismissal order. (Beth Ruiz)
