BUTUAN CITY – Gikustudiya pa karun sa kapulisan ang trailer truck og drayber niini human nalambigit sa disgrasya sa kadalanan nga mikalas sa duha ka kinabuhi kagahapon sa alas 5:00 sa buntag sa may National Highway sa siyudad sa Bayugan sakop sa Agusan Del Sur.
Sa impormasyong nakuha gikan sa Bayugan City Police Station, naila ang mga namatay nga biktima nga sila Donald Cocon Castro, 28-anyos og Winjohn Torion, 21-anyos, parehong olitawo nga residente sa Purok-5 Bidcor, Poblacion, Bayugan City.
Nasayrang gikan pa sa San Francisco, Agusan Del Sur ang mga biktima sakay sa single motor nga MIO, walay plaka numero og pauli na unta sa dihang nadasmagan niini ang kasugat nga trailer truck nga dunay sakay nga mga single motor og gimanehuan ni Junnie Dalman, hingkod ang panuigon.
Base sa nakasaksi, nisirko-sirko matud pa ang single motor hangtud nga Napaslak sa ilalom nga bahin sa sakyanan hinungdan usab sa dili ti-aw nga mga damyos sa kalawasan ang na-angkon sa mga biktima nga miresulta sa hinanaling kamatayon niini.
Anaa pa sa kustudiya sa Bayugan City Police Station ang sakyanan ug drayber samtang gipalawman pa ang imbestigasyon.
