BUTUAN CITY – Gikondena sa Armed Forces of the Philippines ang pagpangsunog sa walhong grupo sa duha ka barges sa Dynamic Mining Corp. niadtong nakalabay’ng gabie.
Kini ang nahimong reaksyon sa AFP human sa pag-angkon sa walhong grupo nga sila ang responsable sa maong hitabo.
Sumala kang Capt. Al Anthony Pueblas Civil Military Operation Officer sa 401st Brigade Philippine Army dakong kadaot ang gihimo sa teroristang NPA dili lang sa nahisgutang mining company kundi apil na ang mga nagtrabaho sa maong kumpanya nga mawad-an ug panginabuhian.
Hugtanong gikondena sa kasundalohan ang maong panghitabo tungod usa kini nga makadaot sa ekonomiya sa nasud.
Sigon ni Pueblas angayan nga tawagong terorista ang New People’s Army tungod kay ang mga binuhatan niining pagpangsabotahe sa ekonomiya sa nasud binuhatan sa mga terorista.
Sa pikas bahin gipadayag sa opisyal nga hinuon dunay parte nga nakadaot ang mining company sa kinaiyahan tungod sa iyang aktibidad apan walay katungod ang teroristang NPA nga mobuhat sa pagsilot sa maong kumpaya tungod kay dunay nagtunhay nga ahensya sa gobyerno alang niini.
Busa dili pa gayod ang environment destruction ang rason sa pagdabdab sa nasangpit nga mga himan kundi ang wala niini pagsunod ug pagbayad sa gipangayong kantidad sa teroristang NPA.
Una nang giangkon sa New Peoples Army Western Agusan del Norte – Agusan del Sur kon NPA Wanas Command nga sila ang nidaob sa 2 barges nga gipanag-iyahan sa Dynamic Mining Corp. niadtong Agosto 24 sa bandang alas 9 sa kagabhion sa Brgy. Lingayao, sakop sa lungsod sa Las Nieves, Agusan del Norte.
Sumala kang Ka Omar Ybarra, gisilotan sa New People’s Army ang nasangpit nga mining company tungod sa reklamo sa katawhan nga hinay-hinay ng niguba sa Agusan River.
Ug ang pagsugod sa operasyon niini bisan nga anaa palang sa lebel sa Exploration permit application kon EXPA ang mga papeles sa kompanya.
Atol sa maong panghitabo apil sa mga nakumpiska ang usa ka shot Gun mga buhing bala, usa ka flash light ug usa ka cellphone.
Samtang gidugang usab sa tigpamaba sa NPA Wanas nga niadto pang niaging tuig dihang ilang gi warningan ang maong kompanya apan wala matod pa kini naminaw. Ug giklaro niini ang isyung gisilotan nila ang maong kumpanya tungod matod pa wala kini nakabayad sa ilang revolutionary tax.
