BUTUAN CITY – Gipa-dismiss sa Office of the Ombudsman gikan sa serbisyo ang duha ka mga pulis sa lungsod sa Kitcharao, Agusan del Norte human nahukmang guilty sa kasong grave misconduct tungod sa pagpusil-patay sa usa ka lalaking duna’y deperensya sa pangisip dihang ilang gilusad ang drug buy bust operation.
Ang pito ka palid nga resolusyong gipirmahan ni Cyril Ramos, Deputy Ombudsman for the Military and other Law Enforcement Offices, nagpa-dismiss sa mga respondents nga sila PO2 Daryle Alonzo og PO2 Larry Precioso, parehong na-assign sa Kitcharao Municipal Police Station.
Mahinumdumang niadtong Oktubre 18, 2016 sa alas-5:30 sa hapon dihang gilusad sa maong mga pulis ang operasyon batuk sa nakamotorsiklong si Expedito Melencion, 35-anyos, residente sa Purok 5, Brgy. Sta. Ana sa lungsod sa Tubay, Agusan del Norte kondiin nakuhaan pa nila kini og tulo ka sachets sa shabu.
Sigon sa igsoon sa biktimang si Marlou, biktima sa mistaken identity ang iyang igsoon tungod kay ang subject matud pa sa ilang operasyon nga na-ilang si alyas ‘Long Hair’, 28-anyos, susama man sa biktima nga duna’y taas nga buhok.
Sa reklamong gipa-abot ni Marlou sa NBI, gipadayag niining ang shabu nga nakuha gikan sa posisyon sa iyang igsoon, planted tungod kay wala matud pa kini’y kakapas nga makig-transact tungod sa estado sa iyang pangisip hinungdan nga gipasakaan nila og mga kasong murder, grave misconduct, abuse of authority og conduct prejudicial to the best interest of the service ang maong mga pulis.
Girekomenda usab sa Ombudsman nga psakaan og kasong murder ang maong mga pulis human nakitang duna’y probable cause ang maong reklamo.
Gawas sa desisyong dismissal sa Ombudsman, ila usab nga gipakansela ang ilang eligibility lakip ang ilang retirement benefits og hingpit nga pagpa-disqualify kanila sa bisan unsa mang public service.
Higayong magretiro, duna’y alternative penalty usab nga mu-abot sa usa ka tuig nga suhulan ang ipatuman batuk sa mga respondents og padayong pagpatuman sa mga accessory penalties nga apil sa principal penalty nga dismissal. (Beth Ruiz)
