BUTUAN CITY – Gisang-at na ngadto sa City Procesutor’s Office ning siyudad sa Butuan pinaagi sa inquest proceedings ang tukmang mga kaso batuk sa anak sa kanhi magti-ayong mayor sa Remedios T. Romualdez kon RTR, sa lalawigan sa Agusan del Norte.
Kini human nakuha gikan sa posisyon ni Ryan Anthony Soliva ang duha ka mga mahalong kalibre 45 na pistola uban sa mga magazines niini og 75 ka rounds sa mga bala ingon man duha ka granada.
Sigon ni P/Supt. Choli Caduyac -regional chief sa 13th Regional Criminal and Detection Unit kon 13th RCDU, usa ka buwan nilang gihan-ay ang pagsuhid sa modus sa suspek human namatikdan ang movements sa mga armas gikan dinhi sa dakbayan sa Butuan padulong ngadto sa Iloilo City.
Gisugdan kini pasado alas-sais hangtud alas-nueve kagabii sa usa ka compound nga duna’y daghang lawak, sa may Brgy. Baan Riverside ning siyudad sa Butuan.
Dugang ni Caduyac, gilusad nila ang raid base na sa search warrant nga gi-isyu ni Judge Nueva sa Bayugan City, lalawigan sa Agusan del Sur subay sa alegasyong ilegal niining pagpamaligya og armas kon gun running.
Dugang ni Caduyac, mga kasong paglapas sa Republic Act 10591 kon Comprehensive Law on Firearms and Ammunition ingon man Republic Act 9516 kon Law on Explosives ang atubangon sa suspek kinsa gikostudiya una sa karsel sa 13th RCDU.
Gipasabot pa ni Caduyac nga ang korte na ang magdetermina kung papyansahon ba o dili ang suspek. (Beth Ruiz)
