BUTUAN CITY – Usa ka rebeldeng kumander sa New People’s Army uban sa iyang teammate ang boluntaryong mitahan ngadto sa kasundaluhang sakop sa 66th Infantry (Kabalikat) Battalion.
Sigon ni Capt. Jeshome Butt, acting Public Affairs Office kon PAO officer sa 10th Infantry (Agila) Division, ang maong kumander og ang iyang teammate kabahin sa grupo sa rebeldeng NPA nga nag-operate sa area sa Sub-regional Committee 1 sa Southern Mindanao Regional Committee.
Gitago pa ang identity sa mga mitahana nga sakop sa “Baking Primera Command” sa Guerilla Front 25 sa CPP-NPA Southern Mindanao Regional Command (SMRC) alang sa ilang seguridad.
Ang ilang pagtahan miresulta ngadto sa pagkarekober sa 57 caliber anti-tank Recoilless Rifle (RR) og anti-personnel RR nga gigamit sa Guerilla Fronts 15 og 25 sa pipila ka mga engkwentro tali sa tropa sa kagamhanan sulod na sa pipila ka mga tuig.
Padayon pa silang gi-imbestigahan og gipa-ilalom sa debriefing isip preparasyon sa ilang enrollment ngadto sa Enhanced Comprehensive Local Integration Program kon ECLIP sa gobyerno. (Beth Ruiz)
