BUTUAN CITY – Misaad ang 27-anyos nga dalagang song composer nga si Winset Rose Jacot nga taga Gran Europia, Brgy. Lumbia, Cagayan de Oro City nga hatagan niya og hustisya ang duha ka kantang parehong misulod sa finals sa Bombo Music Festival 2018 kondiin siya ang interpreter.
Gipadayag kini ni Jacot sa eksklusibong pakighinabi sa Bombo Radyo Butuan kondiin mixed emotions matud pa ang iyang gibati dihang nasayrang nakasulod ang iyang kaugalingong komposisyong ‘Pagod Na Akong Makihati’.
Super happy matud pa siya dihang nasayrang nakasulod usab ang kantang ‘Ikaw Na; nga gi-compose sa iyang higalang si Geraldine Lim kansa entry didto sa Luzon apan siya lang ang nag-interpret.
Excited na matud pa siyang mag-perform alang sa grand finals hinungdan nga karon pa lang, kada-adlaw na siyang mag-vocalize og praktisan ang duha ka mga kanta.
Iyang gibutyag nga ang gi-compose niyang kantang ‘Pagod na Akong Makihati’ base na usab sa iyang kaugalingong kasiantian kondiin pila ka higayon na matud pa siyang nakabaton og hinigugma nga gihimo lang siyang opsyon.
Kini taliwa nga siya ang original girlfriend kondiin mangita og lain ang iyang hinigugma o kaha in love pa sa ilang ex.
Nasayrang ikaduha na nga naka-apil sa grand finals sa national song writing contest ang iyang gi-compose nga mga kanta og ang katapusan, ning mi-aging tuig 2017 lang.
Regular na usab siyang nag-compose og kanta kondiin dayo-dayo ang iyang pag-apil og contest apil na sa Cebu Citya gawas sa ilang siyudad sa Cagayan de Oro. (Beth Ruiz)
