BUTUAN CITY – Dismayadong midangop sa sibyahan sa Bombo Radyo Butuan ang pamilya Espinosa human nga wala girespondihan sa mga sakop sa Butuan City Police Station 1 ang pagpusil-patay sa ilang kabanay pasado alas-siete sa gabii sa Purok 9, Brgy. Bit-os ning siyudad sa Butuan.
Ang maong insidente mikalas sa kinabuhi sa mag-uumang si Renato Espinosa, 40-anyos, minyo og residente sa Purok 14 sakop sa maong barangay. Sigon sa iyang asawang si Marissa, gisaysay matud pa sa duha nila ka minor-de-edad nga mga anak kinsa ka-uban sa iyang bana, nga gikan sila nang-harvest og mangga sa Brgy. Bitan-agan. Mihapit sila sa Brgy. San Vicente kay nagpalit og bugas og isda, og dihang pa-uli na unta, gisundan ang ilang gisakyang motorsiklo sa managsoong suspek nga sila Albino og Tiroy Cembrano, residente usab sa maong barangay.
Dinhi na gipusil ang iyang bana hinungdan sa hinanali niining kamatayon samtang natapsingan usab sa ulo ang usa sa ilang mga anak. Dugang pa sa asawa, pusilon na usab unta ang iyang grade 7 nga anak sa mga suspek apan nahutdan kini og bala rason sa dali nilang pagsibat.
Samtang dismayado si Marissa tungod kay wala girespondihan sa mga pulis ang maong insidente taliwa sa ilang hangyo.
Didto ra matud pa kutob sa police post ang nasangpit nga mga pulis og wala na midalikyat pa sa dapit nga nahitabuan hinungdan nga midalikat sila sa Bombo Radyo.
Human gitawagan ang city police director, adiser pa nakuhaan og pamahayag ang mga kabanay sa biktima human gisundo sa mga pulis dinhi mismo sa sibyahan sa Bombo Radyo. (Beth Ruiz)
